دمعة أم...للشاعر أحمد الهلالي

يقطعونك من وريدي حسبهم ما كني امك
يخنقون انفاسي اللي لك وبك سارت خطاها ..

يذبحون الصبح ساجد بين نبضاتي ودمك
ويفتحون الليل نار اذنوب يصفعني لظاها ..

ما كأنك كنت همي ما كأني كنت همك
في حشاي التسعة أشهر ما كأن الله براها ..

وصدري اللي كل ليلة يشتهي قربك وضمك
حلمتيه اللي ازهرت بك ذابله وأقفى بهاها ..

يا شقاي ويا عذابي من جفا خالك وعمك
يوم أبوك بكبرياه اخفى عروقك من ثراها.

يا ضمير الكون تكفى لا تعامى ويش اصمك ؟
ما تشوف الظلم يبري روح مسلوبٍ ظناها ؟.

احملوا قول الحبيب اللي يكرر كلمة ( امك )
واكسروا طوق العناد اللي حرم أم ٍ هناها ..

كيف يا عطر الحياة المقفية وشلون اشمك ؟
حال دونك شوك تقليد البلاهات وعماها ..

آه يا كثر المرار اللي تحرى عذب يمّك
ارو كبد ام ٍ تفتت جمر من قسوة ضماها ..

ياحبيبي هات همسك هات مرسالك وكمّك
وامسح ابها دمعة انثى تنحدر من عسر ماها ..

ياحياتي نثّروني واحتري ميعاد لمّك
شمعة الصبر المضيئة انت يا الغالي ضياها ..

سلمت يناملك على هذا العرض والطرح الرائع
بارك الله فيكم واحسن اليكم