بداية أتمنى ان العمل الفنى دة ينال اعجابكم
والعمل دة وليد فكرة بسيطة بتحصل معانا
يعنى اذا فكرت الجنيه اللى معاك النهاردة
هيكون مع مين ومين ومين ومين ..... وهكذا
الحلقة الأولى _ قصة حياة جنيه
***********
قام من نومه بدرى
اتوضا وصلى فجره
لبس هدومه ونعله
ووحد الكريم
وتوكل على العليم
الرزاق الحليم
ومد إيده فى جيبه
يشوف إيه يفيده
لقى عم الجنيه
صبح عليه وباسه
وسّع خطوة مداسه
قدام أهله وناسه
كان خايف ع الجنيه
مديون لكل الحارة
خد من البقال سجارة
خد من العطار عطارة
والعضم من الجزارة
وهياكل لحمة ليه
دة اللى فى جيبه جنيه
ماسكه مطبق عليه
أحسن منه يطير
لحد مالوش ضمير
ولا يحافظ عليه
خد بعضه وحاله
ولا خد حد وإداله
وراح شغله فى مكانه
واقف يبيع جرنال
فى كشك عال العال
وفات عليه عبدالعال
يقوله على الموال
بتاع كل يوم
وسأله ع الجنيه
والهم زاد هموم
راح دافع الجنيه
للأمين عبدالعال
عشان يبيع جرناله
ولاغيره يكون مكانه
تقدر تقول أتاوة
أو زى ما تكون حلاة
وعبده جاتله علاوة
خلته بقا بيه
وبقا معاه الجنيه
انتظروا الحلقة التانية