الجزء التانى من الساخرة العيب فينا ولا فى مين ...؟

الجزء التانى من الساخرة
العيب فينا ولا فى مين ...؟


ولا يكونش العيب فى وزير
يعنى إكمنه حرامى كبير
لما الدولة اديتلوا ف خيرها
سرق الدولة وباع مواردها
وادى البيضة وأدى اللى أكلها
وأدى وزيرها مطلع عينها
قالّك يعنى إشمعنى كبيرها
داس على حلم الناس بالجزمة
عجبه حكاية العيش والأزمة
قالّك خلّى الناس الرمة
تعرف معنى العيش واللحمة
ليه يا وزير الدولة يا بيه
هو الشعب عملك ايه
هو اختارك تبقى وزيره
وانت اخترت تبدد خيره
قال الشعب نشوف غيره
غيره طلع ألعن بكتير
قلب القطر
دوَّق شعبه طعم المر
خلَّا الناس من أسمه تهُر
يعنى وزير النقل يعر
وأدى وزير صحة وتعبان
خلَّا الناس تعيا وتتهان
ياخدو علاجهم بالمجان
واحنا نلف الساقية ندور
غالية اللحمة وفيها الدود
وإيشى خنازير وإيشى طيور
بكرة هيبقى مين الدور
لما تجيلنا الكحه شهور
ولا تعرفشى مين دكتور
حتى الكحه مرضها خطير
بكرة وزير الصحة يطير
ويفضل برضوا عيانا خطير
ويمكن يبقى أملنا كبير
لما ساعتها الكحه تروح
بس فى لحظة تموت مدبوح
ولا ليك دية فى داهية تروح
يجى 100 ظابط فى الداخلية
كفه مقاسه ميه فى ميه
ضربوا خالد ضرب قوية
ومات الشاب ياعينى ضحية
قالوا حشاش وبتاع بانجو
قالوا دة فاشل شارب مانجو
عدت برضوا حكاية خالد
والناس فاكرة دة ميت واخد
من الداخلية حشيش وشويش
راحة القصة من التشويش
وادى وزير تعليك مجانى
قالَّك إنسى التعليم تانى
عايز تقرا يبقا هتدفع
زمن الحتة هيرجع تانى
زمن الحتة بربع جنيه
وادى وزير تعليمنا البيه
يبقى وزيرنا الباشا معصلج
غير فى التعليم والمنهج
خلَّا الطالب عمال ينهج
كلكع مخ الواد بالدفتر
قاله تذاكر قبل ما تفطر
إحشى دماغك وهيتبخر
وإذا ما اتبخر راح يتبعتر
ذاكر تانى وتانى يمكن تنجح
بس إنسى انك يوم تفلح
تنجح .. تفلح .. ومتنجحش
بالتعليم هتكون جحش
تاكل تشرب ما تنحش
ويبقى وزير الدولة تمام
وانت يا شعب اتغطى ونام
يبقى العيب من الشعب
ولا العيب فى ابن الكلب



للحديث بقية
انتظروا